subcap_img_006
  • Imprimeix

Sant Jòrdi e eth dragon

Escultura de Sant Jòrdi en Palai dera Generalitat

Escultura de Sant Jòrdi en Palai dera Generalitat

Segons era tradicion populara, Sant Jòrdi ère un militar roman neishut en sègle III ena Capadòcia (Turquia). Eth sant, qu’ère jos es ordes der emperador Dioclecian, se neguèc a portar a tèrme er edicte der emperador qu’ordenaue perseguir as cristians e per aguest motiu siguec martirizat e decapitat pes sòns contemporanèus. Plan lèu se comencèc a venerar coma martir ena part orientau der Empèri Roman e de seguida apareisheren istòries fantastiques ligades ara sua figura.

Era gèsta de Sant Jòrdi e eth dragon se hec populara en tota Euròpa de cap ath sègle IX e siguec recuelhuda per arquebisbe de Gènova, Iacopo da Varazze, mès coneishut coma Iacobus de Voragine, er an 1264, en libre Legenda sanctorum. En aguesta version, era gèsta passaue en Líbia.

Era version dera legenda mès populara en Catalonha explique qu’en Montblanc (Conca de Barberà) i auie un dragon terrible que causaue mauvestats a òmes e bèsties. Entà amaisar-lo, s’escuelhie per sorteg ua persona qu’ère dada en sacrifici ath monstre. Un dia era sòrt assenhalèc ara hilha deth rei, qu’aurie mòrt a mans dera bèstia se non auesse estat pera aparicion d’un beròi shivalièr que s’enfrontèc ath dragon e l’aucic. Era tradicion hig que dera sang vessada neishec un rosèr de flors vermelhes.

Aguesta madeisha legenda, damb leugères variacions, se repetís enes tradicions populares d’Anglatèrra, Portugal o Grècia.

Data d'actualització:  16.04.2014